धरण पाणलोट क्षेत्रात पावसाळ्यात, विशेषतः जुलै-ऑगस्ट दरम्यान, परदेशी पाहुणे फ्लेमिंग पक्ष्यांचे आगमन होते. हजारो मैलांचा प्रवास करून नित्यनेमाने हे पक्षी दरवर्षी याठिकाणी येतात. गेल्या सात-आठ वर्षांपासून या पक्षांची विविध रूपे येथे पाहायला, अनुभवायला मिळतात. फ्लेमिंगो पक्षांच्या सहा प्रजाती जगभर आढळतात, परंतु भारतात ग्रेटर व लेझर या दोन प्रजाती आढळतात.

फ्लेमिंगो हा पाण्यात राहणारा पानपक्षी आहे, आणि त्याचा अधिवास धरण, तलाव, नद्या, खाड्या, जलाशये अशा ठिकाणी प्रामुख्याने आढळतो. चिखलातील शेवाळ हे या पक्षाचे मुख्य अन्न आहे. पाण्यातील तळाशी असणारे चिखलातील शेवाळ मिळवण्यासाठी त्याच्या मानेत, पायात अनुकूल असे बदल दिसून येतात. पाण्यात उभे राहता यावे म्हणून त्याच्या पायाची रचना दोन फुटापर्यंत असते. पायातील नखांमध्ये कातडीचा पातळ पडदा आढळून येतो, ज्यामुळे तो चिखलात सहजपणे चालून अन्न गोळा करू शकतो.

फ्लेमिंगोची मान ही पायाप्रमाणेच लांब असते, त्यामुळे पाण्यातील अन्न शोधून काढणे आणि उडताना शरीराचा समतोल साधण्यासाठी या उंच मानेचा त्याला उपयोग होतो. त्याची चोच गुलाबी रंगाची व बाकदार असून, काळसर रंगाची छटा असते. इतर पक्षांपेक्षा त्याची चोच वेगळी आहे. हा पक्षी मान खाली करून चिखलावर सरकत पुढे चालतो, आणि त्याच्या चोचीची रचना अन्न शोधण्यासाठी विशेषतः अनुकूल आहे.

त्याने मान खाली केली की चोच अलगद चिखलावर टेकते आणि त्यातून अन्नघटक शोषून घेतो. चिखलातील अन्नघटक शोधण्यासाठी हा पक्षी विशिष्ट असा नाच करतो, ज्यामुळे पाण्याच्या तळाशी असणारे अन्नघटक मिळवता येतात.