नाणेघाट

नाणेघाट पुणे शहराच्या उत्तरेला 135 कि. मी. अंतरावर जुन्नर तालुक्यातील मौजे घाटघर या ठिकाणी पाहता येतो. नाणेघाट हा सात वाहन कालीन 2200 वर्ष लाभलेला वनपरिक्षेत्र जुन्नर मधील एतिहासिक वारसा असून, ही वास्तू पुणे जिल्हयातील जुन्नर तालुका व ठाणे जिल्हयातील मुरबाड तालुका यांच्या सीमेवर स्थित आहे. तसेच या ठिकाणी 1500 ते 2000 मी. मी. पावसाची प्रत्येक वर्षी नोंद होत असते. नाणेघाट हा परिसर कोकणकड्या लगत असून, डोंगर- दऱ्याखोऱ्यांनी वेढलेला आहे. त्यामुळे याठिकाणी आदिवासी वस्तींचे मोठया प्रमाणात वास्तव्य दिसून येते. त्यांचे जीवनमान भात शेतीवर आधारीत असून, नाणेघाट पर्यटन क्षेत्र म्हणून त्यांना हातभार लावत आहे. या ठिकाणी लेणी, घाट, कोकणकडे, धबधबे, एतिहासीक किल्ला जिवधन, सुळके व विविध प्रकारची जैवविधता दिसून येते, त्यामुळे दरवर्षी या ठिकाणी 3 ते 4 लाख पर्यटक भेट देत असतात.