महाराष्ट्राचे भौगोलिकदृष्ट्या दोन भाग पडतात. देश आणि कोकण. देश आणि कोकण यांच्यामध्ये सह्याद्रीची मोठी भिंत उभी आहे. त्यामुळे या दोन भौगोलिक विभागादरम्यान व्यापारासाठी किंवा वाहतुकीसाठी ही अजस्त्र भिंत सर्वांनाच पार करावी लागते. हा प्रवास सुखकर आणि आरामदायी होण्यासाठी आपण नवनवे मार्ग बनवले. डोंगर फोडून बोगदे केले, गुळगुळीत रस्तेही साकारले; परंतु हजारो वर्षं आपण मागे गेलो; तर त्याकाळीही देश आणि कोकणाला जोडण्यासाठी घाटवाटांची निर्मिती झाल्याचं दिसतं. निसर्गसंरक्षणाचा नियम पाळून आपल्या पूर्वजांनी या वाटा जपल्या होत्या. विकासाच्या नावाखाली हे घाटरस्ते मोठे करण्यासाठी मानवानं निसर्गाचा ऱ्हास केला. काही वाटांना आजही आधुनिकीकरणाचा स्पर्श झालेला नाही. त्यातलाच निसर्गाचा देखणा अविष्कार दाखविणारा घाट म्हणजे दाऱ्या घाट.